Purificación

Leornard Orr é un investigador espiritual que viaxou por todo o mundo, incluída a India varias veces, e ofrécenos os seguintes pasos para sermos felices:

1.- Terra: Basicamente consiste en alimentarse ben, facer algo de exercicio e ter un traballo que amemos. El considera que é bon ser vexetariano e nutrirnos ben. Hai moitas maneiras de ter un bon contacto coa terra: facer deporte, bailar, cantar, nadar, sentar nun bosque, tocar ou escoitar tambores, traballo manual (incluso sacar o lixo, claro), recibir masaxes…

2.- Aire: É bon ser consciente de como respiramos. Tamén é bon ter un ciclo respiratorio relaxado, para o cal nos podemos axudar facendo ioga, tai chi ou mesmo fixándonos como respiramos. Todo o mundo debera respirar como fan os bebés, unha respiración sa e sen pausas.

3.- Auga: Bañarse todos os días equilibra a enerxía do noso corpo. Os mellores momentos para o baño son ao erguernos e antes de nos deitar. Beber auga cada día tamén é moi importante.

4.- Lume: Segundo Leonard, o lume é tan importante para a saúde mental e física como o é o alimento. Afirma que a maneira máis rápida de saír dunha depresión é estar ante o lume todos os días.  Se non tes unha cheminea ou lareira, tamén podes usar candeas.

5.- Meditar: O importante é observar os pensamentos e, sobre todo, transformar os negativos en positivos. Ler escrituras sagradas de varias relixións (aínda que non sexas crente) ou grandes ideas tamén é bon para a mente. Rezar, ler unha páxina diaria da Biblia ou cantar (ou escoitar) mantras tamén purifica a nosa mente.

6.- Amor: Nas nosas relacións coa xente debemos manter o amor e a diversión. Se pensamos ben de nós mesmos énos máis fácil ter pensamentos positivos doutras persoas. Participar na comunidade e no goberno (local, nacional ou internacional) é unha maneira de amarmos outras persoas. Pasear polo barrio e amar a xente que encontremos nel é unha boa práctica.

7.- Respecto: Respectar persoas moi sabias ou moi boas e tamén estar con elas é unha maneira moi rápida de aprender.

8.- Descanso: Descansar un día á semana permítenos render máis nos outros seis.

Estas prácticas son simples e practicalas só custa un pouco de esforzo.

Risoterapia e Patch Adams

Patch Adams é un tipo moi humano que me cae moi ben. Critica a maioría dos medios de comunicación porque adoitan empregar nos seus contidos a dor e o medo, dan noticias negativas e case non deixan espazo para os debates (cando o deixan) ou as novas positivas (que tamén existen). Hai un película do Robin Williams sobre este americano que é doutor, pallaso, actor, autor e activista social. É un tipo que defende o humor e sobre todo a humanidade para conseguirmos un mundo mellor.

Patch Adams e uns amigos fundaron o Gesundheit Institute, que funcionou como un hospital de comunidade durante 12 anos. Tamén organiza cada ano viaxes ao redor do mundo con grupos de pallasos voluntarios que levan esperanza, alegría e xogos a orfos, pacientes e persoas en xeral. Unha cita textual do Patch é esta: “Hai dous paradoxos nos Estados Unidos: o feito de que sexa unha das nacións con maior número de millonarios e que, á vez, teña meniños que morren de desnutrición; e, por outro lado, que sendo un país supostamente católico teña unha actitude de desprezo respecto á xente máis pobre”. 

Un dos aspectos máis interesantes é o seu traballo coa risa desde hai moitos anos, hoxe tamén coñecida como risoterapia. A risa ten varios beneficios demostrados en diversos órganos do corpo, feito xa coñecido pola medicina chinesa e pola occidental en diversos momentos (aínda que sen moito uso como terapia). O riso estimula o sistema nervioso e este libera endorfinas que actúan sobre o sistema inmune e o endócrino, mellorando a nosa calidade de vida e acelerase a recuperación en procesos patolóxicos.

Usemos narices de pallaso, aparellos de facer burbullas, cantemos, falemos cos anciáns, sexamos amables e rídevos moito.

Telefonía móbil

O Colexio de Médicos de Viena realizou a instancias da Comisión Europea un estudo sobre a telefonía móbil, e nun Boletín sobre as radiacións nos teléfonos móbiles dan os seguintes consellos:

1. Usar o menos posíbel o móbil e durante o menor tempo; é mellor usar o teléfono fixo.

2. Durante as conversacións cun móbil mantelo o máis afastado que poidamos dos oídos.

3. Non telefonar dentro do coche.

4. Cando enviemos un SMS manter o móbil afastado do corpo o máximo que poidamos.

5. Ao comprar un móbil, escoller un que teña os valores SAR o máis baixo posíbeis.

6. Non gardar os móbiles no pantalón nin pegados ao corpo.

7. Na casa, falar polo teléfono fixo.

8. Non usar os xogos do móbil.

9. Se empregamos o “mans libres” do móbil, mantelo lonxe do corpo.

10. Coidado cos wireless LAN e UMTS de carga constante elevada.

Tamén se pide que se apague o teléfono pola noite, non se deixe cerca da cabeceira da cama e non se utilicen os videoxogos que ofrecen estes aparellos.

“Temos que ter en conta que os meniños son máis sensíbeis ás radiacións que os adultos, pois os ósos do cranio son máis finos e os `efectos xenotóxicos´ son maiores nas células infantís”, engadiu o doutor Erik Huber. Os nenos non deberán de usar o móbil antes dos 14 anos, e a partir desta idade deberano usar só puntualmente.

O estudo Reflex do Colexio de Médicos de Viena contou coa colaboración de 12 prestixiosos centros de investigación de sete países europeos. O grupo investigador alemán Verum coordinou os traballos e durante catro anos analizouse como a radiación afecta a células humanas e animais en laboratorio.

Os científicos encontraron que, tras ser expostas a campos electromagnéticos, as células mostraban un notábel incremento nos danos do ADN, e que non sempre eran reversíbeis. No entanto, a investigación non probou de forma concluínte que os cambios producidos representen un risco para a saúde, mais este colectivo internacional sinala que se deben facer máis estudos.

Hixiene segura

A cosmética convencional é un veneno. Non é unha broma, é un veneno para ti e para o medio ambiente. O certo é que a maioría da cosmética convencional usa derivados do petróleo e outros subprodutos moi prexudiciais para ti; si, son relativamente baratos, mais moi caros para a túa saúde. Hai que fixarse nos ingredientes para saber o que usamos, si, lelo moito ben.

Moitos xampús levan DEA ou MEA ou TEA (exemplo: cocamide DEA, Lauramide DEA, trietanolamina), e todos estes deterxentes teñen efecto canceríxeno demostrado. O Lauril sulfato de sodio ao mesturarse con aminas pode formar tamén nitrosaminas e estas resultan canceríxenas. Resumindo: NON merques nada que leve DEA, MEA, TEA ou Lauril sulfato de sodio.

Os desodorizantes que levan parabéns (vaia paradoxo, nada de parabéns ou felicitacións para os parabéns) son xenoestróxenos e disruptores endócrinos, isto é, interfiren no sistema endócrino. Por precaución, parece conveniente evitar estes parabéns, pois están relacionados con algún cancro de mama.

Os clorhidratos, sulfatos e outras sales de aluminio poden provocar trastornos da pel e enfermidades nerviosas como o Alzheimer. O butano e o propano (que hai nas lacas por exemplo) provocan dermatite, irritan os ollos e o sistema respiratorio; ollo, agravan a asma.

O dibutil ftalato DBP é canceríxeno e é tóxico para moitos órganos como fígado, riles, testículos... Favorece o cancro.

Podería seguir, mais prefiro dicir que alternativas temos. A solución é empregar produtos naturais, máis caros pero máis seguros. Realmente os produtos convencionais saen máis baratos a simple vista, mais se o pensas ben saen moi caros porque conducen a diversas enfermidades e quen paga iso?

Ollo, moitas marcas que din ser naturais non son tales, senón que poñen algún ingrediente natural e despois meten moitos ingredientes con efectos prexudiciais. Por iso vou indicar algunhas marcas respectuosas co medio ambiente e contigo (realmente os dous factores acostuman ir unidos):

Dr. Hauschka, Logocos, Börlind, Weleda, Primavera Life, Lavera, Naetura, Santaverde e Planta System son marcas seguras que usan ingredientes realmente naturais. Non as probei todas (algunha si), mais na revista Integral de setembro de 2008 falan sobre estes produtos. A información deste artigo fíxose con datos de investigadores da revista Integral.

Que goces co teu corpo! Goza do teu corpo!

Xocas (música de Fuxan os Ventos: Tempo de maza-lo liño -popular-)

Emilio Cao: Vals do mencer (Amiga alba e delgada)

O lume eterno