A verdade é que a OMS non inspira confianza por varios feitos. Podemos recordar o alarmismo inxustificado que contou sobre a gripe A, pois a OMS dixera que morrerían 150 millóns de persoas e os mortos foron moitísimos menos que os da gripe estacional de cada ano.
O internista Pedro Caba, ex vicepresidente da Organización Mundial da Saúde, dixo "nos han tomado el pelo, empezando por la OMS y los laboratorios". O goberno español tamén meteu a zoca gastando 333 millóns de euros en vacinas e antivirais. As farmacéuticas foron as grandes gañadoras, pois gañaron moitos millóns de euros. Os gobernos de moitos países foron inexpertos ou obedeceron aos intereses das farmacéuticas. E os medios de comunicación maioritarios foron as pezas das multinacionais (pois a publicidade fai que os medios de comunicación estean comprados) para estenderen a noticia falsa. Non me gusta a ciencia cando está avalada por empresas farmacéuticas con intereses económicos, porque esa ciencia non é obxectiva ao primaren os intereses económicos.
Os gobernos caeron no ichó (ás veces tamén son pezas, pois teñen que devolver favores), e despois tentaron revender a baixo prezo os excedentes de vacinas compradas ou aínda peor, mandalas ao terceiro mundo. Non sei quen será mais terceiromundista, porque unha vacina que non serve non se lle manda a ninguén, e menos a un país de baixos recursos económicos e de formación. A ética dalgún goberno non sei eu onde poderá estar.
